L'Asociación pa la Memoria Histórica busca en Grandas los restos de milicianos gallegos

En rempuesta a la publicidá que teníen les "columnes gallegues" qu'avanzaben sobre Asturies, y pa demostrá-yos a los asturianos que bien de gallegos nun simpatizaben col facismu, a últimos de setiembre del 1936 militarizóse'l que sedría "Batallón de Milicianos de Galicia" una unidá na qu'acabaríen bien de los gallegos que con yá vivíen n'Asturies o qu'escaparen de la so tierra pa nun caer presos.

El batallón gallegu lluchó n'Uviéu, Vizcaya y Santander y en setiembre del 1937 pasó destinado a los montes de Lleón, participando en dellos combates hasta que la fin de la guerra nel norte dio colos sos componentes ente San Isidro Puirtu Braña. Al nun ver manera de llegar a Xixón pa embar ar, los milicianos entamaron camín pelos montes cola idea de llegar a Galicia y poder salir dende allí en barcu camín de Francia. La so escapada acabó cerca de la raya ente Asturies y Galicia, cuando la Falanxe y la Guardia Civil de A Fonsagrada (Galicia) dio con ellos nel llugar gallegu de A Torre, executándolos nel intre d'un mou selvaxe qu'incluso recoyeron cantares populares de la zona.

La historia d'esti batallón y los sos componentes va dar un nuevu pasu'l próximu 11 d'agostu, cuando l'Asociación pa la Recuperación de la Memoria Histórica va intentar recuperar los calabres de quince d'estos homes, ente ellos el comandante del batallón, José Moreno Torres, que cree que podríen alcontrase nuna fosa común en conceyu asturianu de Grandas. L'arqueólogu Javier Ortiz, que dirixe delles exhumaciones de foses comunes en toa España, va llevar los llabores d'escavación.