El Principáu niega que metiera tisoria nos puestos de profesores

"La conseyera d'Alministraciones Públiques y Vocera del Gobiernu, Ana Rosa Migoya, negó que se tean reduciendo los puestos de trabayu en Primaria y Secundaria, tal y como-y lo manifiestaron representantes de los sindicatos CC.OO, Suatea, CSI-CSIF y ANPE. Migoya sorrayó que lo que ta faciendo'l Gobiernu ye encarar la ""lóxica reordenación"" de los efectivos, daes les actuales circunstancies.

Asina, esplicó que la realidá demográfica ye ""mui dinámica"" y señaló que nesti momentu los alumnos de Primaria tán aumentando polos picos de natalidá, pero que na ESO ye a la contra. ""Lo lóxico ye reordenar d'un mou apropiáu los efeutivos, según les necesidaes del sistema"", señaló, falando tamién les diferencies ente zones urbanes y rurales.

Sicasí, dixo que'l Gobiernu del Principáu pue presumir de tener una de les meyores ratios del país, con ocho alumnos por profesor, dalgo qu'atribuyó al esfuerciu fechu dende'l Principáu. ""Amás tenemos ún de los meyores resultaos académicos del país"", dalgo que, pela contra, rellacionó col llabor de los profesionales y ""el compromisu de la Conseyería d'Educación""."