Los sindicatos d’enseñanza esixen negociar la carrera profesional

Dempués de la entrada del nuevu executivu asturianu, los sindicatos d'enseñanza SUATEA, CCOO Y CSI-CSIF volvieron a pidir una reunión col Conseyeru d'Educación en demanda de negociación sobre la nueva "carrera profesional" un sistema pol que los docentes comprométense a pasar una evaluación previa de la que nun se conocen los criterios enantes de cobrar una serie de complementos salariales y que los sindicatos califiquen de "documentu en blanco impuestu pola alministración del que nun se conocen los conteníos" .

Los sindicatos aseguren que nun hai base xurídica pal desarrollu de la carrera docente, en cuantes que la Llei de Función Pública Asturiana y l'Estatutu Docente nun existen entovía.

Los sindicatos denuncien que los docentes asturianos "somos los que tenemos los sueldos más baxos de tol Estáu" y aseguren que la conseyería ta anunciando estadístiques de mayestros que yá firmaren acoyese a la carrera profesional que dicen que son falses dafechu, dalgo que se confirmaría cola apaición ente los firmantes de mayestros con menos de 5 años d'antigüedá que nun tienen derechu a participar na midida. Los sindicatos anuncien la vuelta a les movilizaciones dende'l mes de setiembre en p'alantre cola esixencia de que se convoque la mesa sectorial.