“El cuirno” la revista de temes del cabu Peñes, presenta’l so tercer númberu

El Grupu de Baille Tradicional San Félix de Candás ta acabante de zarrar el tercer númberu de la so revista añal, 'El Cuirno', que compila trabayos d'investigación y lliterarios sobre la fastera d'El Cabu Peñes.

Ente los trabayos d'investigación d'esti tercer númberu de la revista hailos de Xosé Lluis García Arias ('Falemos de los pendientes'), Pedro Busto ('Santa Marina Valles: Un exemplu de sincretismu n'El Cabu Peñes') o d'Alberto Álvarez Peña, qu'enxerta los artículos 'Melecina tradicional en Carreño y Gozón' y 'Una urna de piedra na capiya de Santa María Magdalena na parroquia de Samartín de Bocines'.

La revista complétase con artículos d'Armando Rodríguez ('Marañueles na mar'), David Fernández ('La Casa los Busto') y el Grupu de Baille Tradicional San Félix de Candás, editor de la publicación y que presenta un artículu sobre la ropa tradicional usao na villa de Candás.

D'otra manera, na estaya lliteraria compílense proses y versos d'Aurelio G. Ovies, Nines Balmori, Arancha Prado García-Jove, Avelino Llera, Inaciu Galán y Xurde Fernández.

Esti tercer númberu d'El Cuirno va asoleyase coincidiendo col 'III Alcuentru cola Cultura Atlántica' que se va cellebrar en Candás ente'l 23 y el 28 d'agostu cola participación de grupos de música tradicional de Lituania, Italia, Bretaña. Galicia y Asturies.