Evaristo Martínez Radio gana’l Premiu Padre Patac con un trabayu sobre la Guerra de Sucesión n’Asturies

El Premiu Padre Patac, que dende l'añu 1994 premia los meyores trabayos d'investigación n'archivística y bibliografía asturianes, foi nesta edición 2007 pal historiador Evaristo C. Martínez-Radío Garrido, espertu n'historia militar, pol so trabayu d'investigación "La Guerra de Sucesión n'Asturies" que mereció'l reconocimientu del xuráu d'esti premiu dotáu con 6.000 euros. El xuráu valoró'l calter inéditu del trabayu, que ye'l primeru que trata sobre la incidencia n'Asturies de la trescendental guerra que dio llugar al cambéu de la dinastía de los Habsburgo polos Borbones al frente de la Monarquía Española a primeros del sieglu XVIII

.

José María Patac de Las Traviesas, cura xesuita y activu personaxe de la vida cultural asturiana (1911 -2002) yera abondo famosu pola so biblioteca personal de temes asturianos, una colección qu'entamó en 1.966 y pa la qu'acabó atropando más de 12.000 títulos, dellos incunables y toos obres d'importancia grandísima pa la investigación, amás de más de 18.000 semeyes y otros tantos mapes y cartafueyos. La del Padre Patac convertiose nuna de les biblioteques particulares más importantes d'Asturies y él mesmu acabó donándola al Ayuntamientu de Xixón, que la tien puesta pa consulta d'investigadores na Biblioteca del Conceyu.