“Xuristes pol Asturianu” afirma que pal Gobiernu l’asturianu ye cosa de “la bohemia artística”

El colectivu d'abogaos y especialistes en derechu "Xuristes pol Asturianu" refirióse ayeri con "vergoña y tristura" a l'actitú del gobiernu asturianu na causa xudicial pol derechu del lletráu Xurde Blanco Puente a poder rellacionase n'asturianu cola alministración asturiana y que nel que'lo titular del Xulgáu de lo Contencioso-Alministrativo númberu 3 d'Uviéu anunció la posibilidá d'interponer una custión d'inconstitucionalidá escontra los artículos 2, 4 y 7 de la Llei d'usu y promoción del asturianu, ufiertando darréu a les partes el plazu establecíu de diez díes p'alegar.

L'asociación esplica como'l demandante Xurde Blanco Puente presentó "con tiempu, argumentos abondos en defensa de la Llei". Pela so parte, el Ministeriu Fiscal nun presentó alegaciones polo que dende "Xuristes pol Asturianu" entienden que la fiscalía "nun tien interés n'ocupase de los drechos llingüísticos de los asturianos". Por embargu, el Gobiernu'l Principáu sí que faló pero, según Xuristes pol Asturianu "acordies col resultáu, más-y valiere tamién quedar callau, porque lo que dixo ye pa enllenar a tolos ciudadanos asturianos comprometíos cola democracia y l'Estáu de Derechu de vergoña y tristura". El colectivu de xuristes afirma que l'executivu asturianu coles sos alegaciones "fai del fenómenu llingüísticu causa de confrontación política, oxetu d'inseguranza xurídica y fonte de discriminación ciudadana y arbitrariedá alministrativa".

Ello ye que la representación procesal del Principáu entama'l so escritu defendiendo la plena vixencia del artículu 4 del Estatutu d'Autonomía, reconociendo l'usu de la llingua "nos ámbitos culturales, artísticos y sociales… campañes institucionales de publicidá y comunicación, de publicaciones, del BOPA, de llogotipos diversos…" pero al empar el Principáu afita nel so escritu la "imposibilidá de que los empleaos públicos usen o se comuniquen nel exerciciu de les funciones que-yos son propies en llingua distinta al castellanu". Sicasí, el testu del Gobiernu asturianu afirma que "cuando una persona ayena a l'Alministración del Principáu emplegue l'asturianu pa dirixise a esta, l'Alministración almita a trámite l'escritu de que se trate, evitando un trámite d'igua d'errores en casos nos que, poles particularidaes culturales del ciudadanu, pola fácil compresión del testu o por cualquier otru motivu, se considere preferible almitir a trámite l'escritu evitando posibles indefensiones o retrasos nel procedimientu".

El testu d'alegaciones del Gobiernu llevantó les lóxiques angüeñes en Xuristes pol Asturianu, qu'afirma que p'Areces "l'emplegu del asturianu tien de circunscribise a la bohemia cultural y artística" y "a la ciudadanía con particularidaes culturales" -que s'entruga en que consisten- y ello "siempres que la superioridá gubernativa tenga a bien dase por enterada de lo que los ciudadanos afarfullen y cuando, los probitinos, dean bien de pena, porque, casu contrariu, escorrerálos con "un trámite de subsanación de errores" que-yos va quitar dafechu les ganes d'andar cafiando".

"Xuristes pol Asturianu" ve una doble vara de midir nel fechu de que "les campañes institucionales, la subvención de publicaciones, el BOPA y los llogotipos tengan bula mientres qie l'exercicu ciudadanu del derechu al usu normal de la propia llingua nún Estáu que se define como Democráticu y de Derechu, nun lu tenga".

Sicasí, lo más grave pa Xuristes pol Asturianu ye que l'escritu d'alegaciones de l'alministración nun faiga nenguna mención de la Llei 1/98, d'usu del asturianu que ye "lo que'l xuez pon en cuestión".