La FSA da por cuasi zarráu l’alcuerdu de Gobiernu a nivel de programa, mientres qu’IX-BA-LV afirma qu’entovía falta

La dirección de la FSA-PSOE declaró ayeri que yá daba por peslláu l'alcuerdu programáticu con IX-BA-LV pa llegar a un pautu de gobiernu a nivel de programa. Sicasí, la dirección d'IX-BA-LV declaró nun tar d'alcuerdu cola propuesta d'organigrama de gobiernu que-y planteó la FSA na reunión d'ayeri y que partía, según pudo sabese, de la reedición del organigrama de conseyeríes de la pasada llexislatura, con diez estayes de Gobiernu y ufiertándose-y a la coalición les dos mesmes conseyeríes (Vivienda y Bienestar y Xusticia y Rellaciones Esteriores) que tuvo hasta agora.

Según informó la diputada Noemí Martín, IX-BA-LV tamién esixó mecanismos y garantíes que permitan garantizar el bon funcionamientu del pautu de gobiernu y qu'ayuden a garantizar la llealtá y la corresponsabilidá ente les partes. La diputada negó la mayor énte l'optimismu socialista al afirmar qu'al alcuerdu programáticu faltá-y entovía bien d'ello pa tar rematáu, existiendo, según comentó la diputada Noemí Martín diferiencies graves en cuestiones como la vivienda, el mediu ambiente, bienestar social, sanidá, fiscalidá y tamién en política llingüística, onde'l documentu de trabayu sigue recibiendo reformes y amestadures.