El Muséu del Pueblu d’Asturies asoleya l’Asturies de 1928 na colección “Loty”

El director del Muséu del Pueblu d'Asturies, Juaco López, presentó ayeri la esposición "Asturies 1928. Fotografíes de Loty" que va tar abierta d'equí al 23 de setiembre nes instalaciones del muséu de Xixón. Tratase de 80 imáxenes esbillaes de la colección de más de 7.000 que tien la Fototeca Histórica del Institutu del Patrimoniu Históricu Español (IPHE) de la colección "Loty" casa madrileña de postales y fotografía en xeneral p'archivos y publicaciones pa la que trabayaron ente otros fotógrafos, el retratista portugués António Passaporte (1901-1983), que foi l'autor de les imáxenes d'Asturies que puen vese na esposición y que son d'ente los años 1926 y 1936. Ye la primer vegada que'l Muséu del Pueblu d'Asturies presenta una amuesa fotográfica de fondos que nun-y pertenecen. La Fundación Mapfre collaboró pa qu'esta esposición fuere posible.