PSOE y IX-BA-LV lleguen a un alcuerdu pa gobernar Avilés y avancen nel pautu pa Xixón

Los representantes de la Federación Socialista Asturiana (FSA)-PSOE y d'IX-BA-LV volvieron ayeri llunes a la mesa de negociación pa llograr un alcuerdu de gobiernu p'Asturies, dempués de recuperase la negociación francida pola crisis de Cangas del Narcea y d'un fin de selmana en que dambes partes tuvieron pasándose documentos d'análisis p'acelerar el diálogu. Los representantes de les dos partes declararon que l'alcuerdu yá ta mui avanzáu, alcontrándose yá trataos cerca del 60% de los puntos del acuerdu pero entovía van precisase más reuniones, sobremanera pa tratar la estructura que pueda tener el futuru gobiernu de coalición.

A nivel de programa, el socialista Javier Fernández reconoció que'l principal pilancu ente les dos organizaciones ye'l del tratamientu de la llingua asturiana, anque nun quixo dar más detalle sobre ello en cuantes que la discusión sobre'l particular "ha facese dientro". Jesús Iglesias, pela so parte, reconoció que l'asturianu ye una materia sobre la que va tener que falase muncho pa llegar a un puntu d'alcuentru en cuantes que les posiciones sobre l'asuntu tán bastante estremaes. Fontes de la negociación apuntaron a Asturies.com que la cuestión del llugar de la política llingüística nel pautu de Gobiernu y tolo tocante a cultura van tratase probablemente na reunión de güei martes, dempués de qu'ayeri llunes se falare de bien d'asuntos, ente ellos la politica fiscal, el modelu económicu de l'autonomía y les polítiques d'empléu, amás d'otros bloques de politica territorial y mediu ambiente. La xestion de residuos y la politica del agua apaecieron na reunión d'ayeri, de la que salió, según fontes consultaes por esti mediu, un compromisu p'analizar y llevar alantre toles midíes alternatives a Caliao o a la incineradora de Serín, dos de los puntos de rocea ente les formaciones. Les polítiques de seguridá publica, bienestar social y cooperacion al desarrollu, xusticia y emigracion y les de mediu rural y pesca completaron una xornada maratoniana na que tamién se faló del marcu en que pue facese la reforma del estatutu.

N'acabando la reunión, el socialista Fernando Lastra y Angel González, pela parte d'IX-BA-LV, afondaron ayeri nel debate pendiente sobre l'asturianu, y con almitir que'l debate a nivel de pautu de gobiernu ta cuasimente allancáu, alvirtieron de que les dos partes dieron con "una manera de falar d'ello tocante a la definición que va tener nel Estatutu d'Autonomía". Nesti sentíu, Ángel González enfotóse en que pueda consensuase una reforma del Estatutu que contente a dambes partes". Ensin dar muncha más información, Lastra comentó que yá hai delles pingarates sobre la reforma del Estatutu, casu de la creación d'un catálogu de derechos y deberes, la creación de competencies nueves o la visión asturiana de la financiación autonómica, anque Lastra sorrayó que la reforma del Estatutu ha alloñase "de discusiones identitaries estrañes".

Los representantes de les dos formaciones esplicaron que se trabaya con un documentu que yá tien cerca de 60 fueyes y que nelles yá s'inxeren cerca del 60% de los puntos del programa de gobiernu.