Un xuez pon un recursu d’inconstitucionalidá contra la Llei d’Usu del Asturianu

La Llei d'Usu del asturianu, únicu encontu llegal qu'apauta dende 1998 les posibilidaes y derechos de los falantes d'asturianu, enfréntase a un recursu d'inconstitucionalidá sobre trés de los sos artículos. El responsable d'ello ye'l xuez titular del xulgáu númberu 3 de lo Contencioso-Alministrativo d'Uviéu, Miguel Ángel Carbajo Domingo, que ye l'encargáu de llevar el pleitu del lletráu Xurde Blanco Puente cola Conseyería de la Presidencia del Principáu d'Asturies, que dictó ayeri una providencia na que plantea la posible inconstitucionalidá de dellos artículos de la Llei 1/98 d'Usu y Promoción del Asturianu.

La demanda de Xurde Blanco viniera al rau de la negativa por parte de la Conseyería de la Presidencia d'almitir un pidimientu de baxa médica pa poder operase. La razón yera que'l documentu taba redactáu n'asturianu. Agora, el xuez encargáu del casu retruca afirmando que los artículos de la Llei 2, 4 y 7 de la Llei d'Usu del Asturianu, que son los que resulten aplicables al casu podríen ser inconstitucionales, una afirmación que se tien na posible inxerencia de la Llei "en materia que ta acutao formalmente al Estatutu d'Autonomía" colo que se convertiría automáticamente nuna llei "con vocación d'oficialidá". El xuez Carbajo Domingo afirma que la llei "métese en materia que ye propio de la llexislación alministrativa básica y nel estatutu de los funcionarios tocante al llinguaxe alministrativu oficial" y denuncia qu'esos artículos tán redactaos "en términos imperativos", afirmando nel tercer puntu de la so providencia que la Llei d'Usu podría inxerir nuna "posible conculcación del derechu d'igualdá de los ciudadanos en rellación a la so actividá énte les Alministraciones públiques".

Les partes disponen agora de diez díes pa formular les alegaciones que-yos abulten precises. N'atendiéndoles, el maxistráu va poder afitase a desistir del so recursu d'insconstitucionalidá. Dende l'Aconceyamientu de Xuristes pol Asturianu, organización de xuristes comprometíos cola llingua de la que forma parte'l mesmu Xurde Blanco, la cuestión "ta redactada nunos términos que'l Tribunal Constitucional nun tendria qu'almitir a trámite". Sicasí, Xuristes pol Asturianu diz que quier más esperar a conocer más posicionamientos pa facer pública la so postura énte'l recursu y el procesu en xeneral del casu de Xurde Blanco.