Los sindicatos d’enseñanza píden-y al Gobiernu que retire’l proyectu de carrera profesional

Los sindicatos de la enseñanza pública non universitaria d'Asturies SUATEA, CCOO y CSI-CSIF esixeron ayeri que'l Gobiernu asturianu retire'l proyectu de carrera profesional docente, como mínimo hasta que se constituya'l gobiernu de la llexislatura nueva. La representante del sindicatu Suatea, Beatriz Quirós , Lucas Álvarez por CSI-CSIF y Luis García CC OO dieron una rueda de prensa conxunta na que criticaron l'actuación del Conseyeru d'Educación José Luis Iglesias Riopedre, y tamién la de la conseyería d'Economía y Alministraciones Públiques por negase a aconceyar con ellos.

La primer midida de protesta va ser una manifestación que va salir esti miércoles a les 12 y media dende la Plaza d'España d'Uviéu, au s'alcuentra la Conseyería d'Educación.

Xunto cola marcha, el miércoles 20 los trés sindicatos convoquen una fuelga hasta que se retire la midida o s'abran negociaciones pa tratar el conteníu de la Carrera Docente, que Beatriz Quirós calificó de "cheque en blanco" que l'alministración pon pa que firmen a los profesionales de la enseñanza ofreciéndo-yos unes remuneraciones qu'Educación nun se compromete formalmente a dar y qu'aseguró que s'acuta'l drechu a retirar dexando al colectivu docente en peores condiciones de salariu de les que ta, al empar que-y niega retribuciones y complementos que tien ganaes y prometíes de va tiempu. Quirós sorrayó como'l proyectu d'Estatutu Docente nun va desarrollase n'España nesta llexislatura, polo que dixo que tola iniciativa en sacalu alantre ye del Gobiernu asturianu, que taría faciéndolo ensin el marcu llexislativu precisu.

De los sindicatos mayoritarios d'enseñanza, namás UXT se desmarca de la protesta y diz que ta d'alcuerdu col proyectu del executivu asturianu.