Los sindicalistes Cándido y Morala ingresaron na cárcele de Villabona

Cándido González Carnero y Juan Manuel Martínez Morala, los dos sindicalistes de la Corriente Sindical d'Izquierda (CSI) condenaos a trés años de cárcele polos estrozos produciós nes movilizaciones del sector naval, alcuéntrense dende esti sábadu na cárecele de Villabona. La Policía Nacional detúvolos a les 8 de la tarde del sábadu n'acabando una concentración de protesta énte la casa conceyu de Xixón y cuando los dos volvíen a los sos domicilios.

Los deteníos tuvieron cerca d'una hora na comisaría de Xixón. Más de mediu centenar de persones allegaes a Cándido y Morala acudieron a la comisaría en señal de protesta, teniendo llugar una carga policial al salir los coches que llevaben a los deteníos a Villabona. Como resultáu de la carga, Lisardo Suárez, militante del PCA, tuvo qu'ingresar n'hospital por mancadures nuna rodiella.

Les detenciones y el treslláu a presidiu tienen llugar dempués de que'l xuez Lino Rubio Mayo decretare la execución de la sentencia con dos díes d'adelantu sobre la fecha del llunes, en que l'abogáu que representa a los dos sindicalistes anunció que diba presentar un recursu d'amparu y escritu pidiendo la suspensión de la condena hasta que'l Tribunal Constitucional resolviere esti recursu. La plataforma de sofitu a los dos sindicalistes va celebrar el domingu 17 a les 7 y media una asamblea na casa sindical de Xixón pa decidir movilizaciones y actuaciones pola actual situación.