El Conseyu de Gobiernu aprobó'l currículum educativu de la ESO

El Conseyu de Gobiernu asturianu aprobó ayeri'l currículum d'Educación Secundaria Obligatoria (ESO) que va emplegase dende'l cursu qu'entra en p'alantre. Con esta aprobación peslla'l ciclu de renovación curricular de la enseñanza asturiana, tres de l'aprobación va delles selmanes del curriculum de primaria. Anque dende'l Gobiernu sorráyase como'l testu pasó pel debate nos centros educativos y contó col preste de'l Conseyu Escolar y el Conseyu Consultivu, tamién hebo voces que criticaron el procesu. Asina, dende'l sindicatu d'enseñanza SUATEA, un de los que lideraron les movilizaciones contra'l currículum y especialmente contra'l tratamientu qu'esti daba a la llingua asturiana, valorose p'Asturies.com l'aprobación definitiva de los curriculum como "una oportunidá perdida p'avanzar na normalización del asturianu na enseñanza".

La primer valoración del responsable de llingua de SUATEA Llinu Álvarez nun podía ser más negativa. La falta de voluntá pa negociar el testu por parte de la Conseyería, a la que se-y llegó a pidir trés vegaes por escrito una mesa de negociación, el fechu de que los testos aprobaos nun representen avances na dignificación de l'asignatura nin del profesoráu que la pon y el que l'asturianu nun trescale nel sistema educativu más allá de l'asignatura de llingua, cuando podía ser el momentu pa que se pudieren impartir otres asignatures en llingua asturiana como yá prometeiere'l conseyeru, faen que la oficialización de los curriculum se valore como una derrota pal asturianu. Álvarez llamentó tamién que tol procesu d'aprobación de los curriculum se viere chiscáu amás por declaraciones "vomitives" del Conseyeru d'Educación José Luis Iglesias Riopedre, en referencia a les palabres del conseyeru en qu'aseguraba que'l 85% de los padres nun queríen que l'asturianu fuera "asignatura obligatoria" ello mientres los sindicatos reclamaben nun encierru de profesores celebráu n'Uviéu, que l'asignatura superare l'estatus d'optatividá y el réxime de ratios mínimes d'alumnos pa impartila pa pasar a ser materia voluntaria y d'ufierta universal.