El conseyeru d’Educación de Cataluña presenta un nuevu plan d’inmersión llingüística

"Ernest Maragall, conseyeru d'Educación de la Generalitat de Cataluña, anunció un nuevu plan d'inmersión llingüística que cuenta pueda afeutar a unos 80.000 alumnos d'Educación Infantil y Primaria. L'oxetivu del plan ye aumentar el númberu de clases col catalán como llingua vehicular, asina como l'usu ""social"" de la llingua nel centru. Pa ello va dase puxu a les estratexes que trabayen los elementos visuales, xestuales, afeutivos y de rellación coles families.

Dende la conseyería d'Educación de Catalunya sorráyase la necesidá de que los conocimientos nes primeres estayes, Infantil y Primaria, tengan un desarrollu asemeyáu na Educación Secundaria. Pa ello la Conseyería cuenta invertir 2'3 millones d'euros, aplicando'l plan, nun primer momentu, sobre unes 84 escueles.

Esti plan asitia a Cataluña nun puestu cabezaleru nes polítiques d'inmersión llingüística, un conceutu que naz n'España durante la Transición y que nun s'espeya nes polítiques llingüístiques d'Asturies. Pela contra, casos como'l tratamientu del asturianu nel Currículum d'Educación Infantil presentáu hai bien poco, y denunciáu dende sindicatos d'enseñanza y organizaciones de defensa del asturianu como una amuesa de la falta de voluntá política del gobiernu asturianu pol caltenimientu de la llingua. Más información nel dixital catalán Vilaweb."