Javier Valledor tensa l'ambiente énte la segunda reunión ente PSOE y IX-BA-LV

La FSA-PSOE y IX-BA-LV enfréntense esti miércoles na sede de los socialistes al so segundu alcuentru de negociación con vistes a la repitición del alcuerdu de gobiernu p'Asturies, una negociación que tendría de rematase primero del 21 de xunu, cuando tien de constituyise'l Parlamentu asturianu. Dempués del primer alcuentru celebráu esti llunes y del que nun trescendieron a la prensa los asuntos trataos, sacante'l calandariu de reuniones y les declaraciones de bona voluntá peles dos partes, polo que siguen ensin despeyase les incógnites sobre les cuestiones qu'estremen el discursu de les dos partes, casu de la llingua asturiana o l'embalse de Caliao.

El conseyeru de Xusticia Javier Valledor foi de los pocos políticos que francieron la discrección cola que ta llevándose la negociación y ayeri mesmo echó-y la culpa a la Federación Socialista Asturiana (FSA) de poner enzancos a un futuru pautu de gobiernu cola coalición. Valledor aseguró que la FSA, en cuenta d'intentar llegar a puntos d'alcuerdu "paez que quier qu'españe la negociación" acusando a los socialistes de plantear "cuestiones inamovibles" en cuenta de "ver les coses en que se coincide, facer una valoración global y d'ehí en p'alantre ver si ye abondo o non pa llograr un alcuerdu.