Mediu Ambiente estudia dexar el ganáu muertu d'alimentu pa los animales

"La Conseyería de Mediu Ambiente y Desarrollu Rural va estudiar la posibilidá de permitir que los animales rumiantes muertos en Picos d'Europa nun se treslladen a Cogersa pa destruyilos y puean sirvir d'alimentu a les aves necrófagues o carroñeres de la zona. L'Alministración va tomar la decisión d'equí n'ún mes, dempués d'estudiar a fondu les posbilidaes.

El director xeneral de Ganadería y Agroalimentación, Enrique Rodríguez Nuño, dempués d'aconceyar col director del Parque Nacional de Picos d'Europa, Rodrigo Suárez Robledano, adelantó esta posibilidá a l'Axencia Europa Europa Press. Rodríguez Nuño afirmó que foi'l director de Picos el que propunxo la posibilidá de xestión de los animales muertos pa que les aves necrófagues puean alimentase d'ellos, una propuesta que ya se plantegara hai unos meses nun conceyu de directores xenerales de ganadería. El responsable d'esti cargu recordó que nesti momentu, por reglamentu, los rumiantes muertos tienen d'unviase al basureru de Cogersa, onde s'eliminen. Al so xuiciu ""hai posibilidaes d'afayar el sistema que permita dexar los rumiantes muertos na zona pa que sirvan d'alimentu a les aves carroñeres"". ""Nos animales non rumiantes va poder facese, colos rumiantes vamos estudiar la posibilidá de facelo según les disposiciones de la Comisión Europea"", dixo Rodríguez Nuño, que destacó les ventayes qu'esta propuesta diba trayer, non sólo pa les aves, sinón que recordó qu'hai zones remotes onde amás ye mui costoso y difícil poder recoyer los animales muertos. Per otra parte , dambos cargos tamién abordaron la xestión de los pastos comunales y la ellaboración d'una programación apropiada de les campañes de saniamientu pa los mesmos."