La FSA y IX-BA-LV lleguen a un alcuerdu pa gobernar 21 conceyos

La Federación Socialista Asturiana y IX-BA-LV llegaron ayeri a un alcuerdu pol que se garantiza que na composición de los conceyos asturianos va escoyese como alcalde al candidatu más votáu d'ente estes dos formaciones polítiques, lo que supón na práctica la robla de 21 conceyos en que enguna de les dos formaciones tien mayoría absoluta. Quince conceyos van cayer del llau socialista y otros 6 pa la parte d'Izquierda Xunida- Bloque por Asturies - Los Verdes.

Ayer, Bual, Cangas del Narcea, Xixón, Llangréu, Llaviana, Mieres, Morcín, Navia, Parres, Riosa, Teberga, Avilés Ribeseya y Noreña van ser los conceyos d'alcaldía socialista, y Casu, Castrillón, Degaña, Illas, L.lena y Santalla d'Ozcos los que tengan alcalde d'IX. Queden pendientes les alcaldíes de Carreño y Siero, onde se precisa'l sofitu de terceres fuerces polítiques.

Tres de producise esti alcuerdu pa gobernar nos conceyos, les dos partes fexeron valoraciones positives sobre la posibilidá de roblar un alcuerdu pal gobiernu d'Asturies, anque les conversaciones pa esta cuestión van retrasase hasta la selmana qu'entra. Sicasí, el Conseyeru de Xusticia y númberu 2 d'IX-BA-LV Francisco Javier García Valledor, albidró una negociación difícil por causa de les diferencies de programa ente les dos formaciones.


L'alcuerdu pa gobernar nos conceyos asturianos ente socialistes y IX produzse al empar qu'otru alcuerdu d'ámbitu estatal que va blindar pa estes dos formaciones más de 400 alcaldíes en toa España.