FSA-PSOE y IX-BA-LV entamen a negociar colos alcuerdos nos conceyos enriba la mesa

Les direcciones de la Federación Socialista Asturiana (FSA) y de la coalición IX-BA-LV aconceyen esti llunes na sede de los socialistes asturianos pa entamar les negociaciones con vistes a repitir el pautu de gobiernu n'Asturies. Según esplicaron el secretariu d'organización de la FSA Jesús Gutiérrez y el líder d'IX-BA-LV Jesús Iglesias, los alcuerdos pa gobernar nos conceyos van ser el primer puntu a tratar, en cuantes qu'estos tienen que tar constituyíos pal 16 de xunu, pa pasar darréu a les cuestiones que cinquen a la formación del gobiernu asturianu. Iglesias apurrió'l matiz de que nun se trata de quedar namás nel ámbitu local nel nomamientu d'alcaldes y que nesta parte del procesu s'avance pa llegar a gobiernos plurales que dean estabilidá".

Énte les negociaciones pa formar gobiernu nesta llexislatura , el presidente asturianu Vicente Álvarez Areces declaró que los socialistes van cola "predisposición de llegar a un alcuerdu". Tocante a ún de los temes que se cuenta que van crear más rocea ente les dos partes, la oficialidá del asturianu, dende la FSA Jesús Gutiérrez nun quixo facer nenguna valoración, mientres que Jesús Iglesias adelantó que'l so partíu va dir a les negociaciones con tolos conteníos del so programa, incluyíu l'asturianu.