Acaba esti xueves el plazu pa matriculase na Prueba de Capacitación de l’ALLA

"L'Academia de de Llingua Asturiana organiza dos convocatories añales d'esta prueba que tien, como oxetivu fundamental, l'amosar el conocimientu de la llingua asturiana, tanto nel planu llingüísticu como sociollingüísticu de la mesma. Nesti casu la prueba va tener llugar esti sábadu 26 de xineru a les 9:30 la mañana na Facultá de Pedagoxía de la Universidá d'Uviéu.

La prueba tien dos partes: una escrita, na que tien de superase un dictáu, dellos exercicios gramaticales y una redaición, y per otru llau una falada, na que tendrá qu'amosase'l dominiu de la llingua nuna situación comunicativa concreta. Pa superar dambes l'Academia de la Llingua desixe'l conocimientu de la normativa básica de la llingua asturiana, pa lo que propón l'usu de la Gramática de la llingua asturiana na so edición del 2001 y les Normes ortográfiques del 2005.

Pa completar el procesu de matrícula habrán d'abonase los 12 € que correspuenden a les tases d'esame y entregar una ficha de datos y una semeya de carné nes oficines de l'ALLA, C/Marqués de Santa Cruz, 6 - 2u."