El Defensor del Pueblu denuncia les torgues que-y pon la Conseyería d’Infraestructures

La memoria del Defensor del Pueblu conseña a la Conseyería d'Infraestructures, Mediu Ambiente y Ordenación del Territoriu d'Asturies como una de les entidaes que más torgues-y punxo nel so llabor, faciendo referencia esplícita a la solicitú d'un informe'l 12 de mayu de 2004 sobre espacios naturales non protexíos y otru del 4 d'agostu de 2004 sobre una corta d'árboles posiblemente illegal.

La Conseyería de Cultura, Comunicación Social y Turismu, que nun retrucó a una solicitú d'ampliación d'un informe sobre la destrucción d'un Camín Real recoyíu na Carta Arqueolóxica del conceyu de Samartín del Rei Aurelio y que s'esfaltó con hormigón. Mediu Ambiente, que nun retrucó a una denuncia por vertíos irregulares, y la Conseyería de Salú tamién apaecen nel informe, que recueye dellos casos de conceyos que-y punxeron tamién problemes al Defensor nel so llabor. Asina Uviéu, que nun atendió una la solicitú d'informe sobre la contaminación atmosférica y acústica d'una empresa y el Conceyu de Gozón tamién apaecen na llista

Los asturianos presentaron nel 2006 483 espedientes de quexa énte l'organismu que dirixe Enrique Múgica, más de 100 más que nel 2005. L'alministración económica, la educación y cultura, sanidá y política social son los asuntos que más apaecen nes quexes.