Esbarrumbe históricu de la bolsa de Madrid

"Llunes negru nes bolses de mediu mundu. Pesie al anunciu del vienres del presidente d'Estaos Xuníos, George W. Bush, de favorecer les rebaxes fiscales pa ser a encarar la crisis financiera, los mercaos asiáticos y europeos pesllaron ayeri una xornada de perdes na que la bolsa de Madrid foi cabezalera no negativo. L'Ibex 35 finó la sesión con una cayida del 7,45%, el segundu mayor recorte de la so historia, devolviéndolu a niveles del 2006. Sicasí, el vicepresidente y ministru d'Economía y Facienda, Pedro Solbes, llamó a la calma pa nun xeneralizar la pallabra 'crisis' y ver evolucionar l'asuntu, al tiempu qu'aseguró que dende España la situación déxanos mirar pal futuru ""con tranquilidá"".

En total, les compañíes qu'integren l'Ibex 35 perdieron 47.131 millones d'euros de capitalización na xornada bursátil, según datos de la Sociedá de Bolses. D'esti mou, el valor de mayor pesu nel índiz, Telefónica, con una capitalización total de 95.708 millones d'euros, perdió 7.065 millones d'euros respeuto al pieslle del vienres, cantidá asemeyada a la que dexó Santander na sesión (7.005 millones d'euros), qu'asitió la so capitalización en 70.798 millones d'euros. Amás, BBVA baxo'l so valor bursátil en 3.710 millones, hasta asitiar la so capitalización en 49.473 millones, ya Iberdrola perdió 6.142 millones de valor en bolsa, quedando la so capitalilzación en 42.696 millones."