El tramu d'autovía ente Sotu’l Barcu y Muros va entrar en serviciu esti vienres

Seis años dempués d'alxudicase la obra y con trés años de retrasu sobre la fecha d'entrega prevista, el tramu ente Sotu'l Barcu y Muros del Nalón de l'Autovía del Cantábricu va abrise al tráficu esti vienres. Presupuestáu en 80 millones d'euros y con un coste real al final de la obra de 97 millones (más de 16.100 millones de les antigües pesetes), esti tramu d'autovía de namás 6,4 kilómetros ye'l más caru de la historia d'Asturies, un preciu y un retrasu nel que tuvo que ver l'esfarraple de la estructura de la ponte sobre'l Nalón cuando taba construyéndose.

Dende esti vienres, cola aertura del nuevu tramu, la retonda de Sotu'l Barcu, tradicional puntu escuru de la rede viaria asturiana nel que tolos fines de selmana se producíen importantes atascos, va dexar de ser l'estragal pel que pasen tolos vehículos que circulen ente la costa occidental y Avilés. El tramu ábrese al tráficu un mes dempués que los tramos ente Cadavéu y Outur qu'inauguró la Ministra de Fomentu Magdalena Alvarez.

Por coincidir con periodu electoral nun va facese inauguración oficial, lo mesmo qu'asocedió na otra carretera qu'entamó a apurrir serviciu a lo llargo d'esta campaña, la AS-II ente Uviéu y Xixón y lo mesmo que va asoceder n'otra carretera que va abrise al tráficu esti día 25, nesti casu'l tramu del Corredor del Nalón que llibra'l pasu per Lada (Llangréu).