Los profesores de música y educación plástica protesten pola mengua d’hores d’enseñu

Cerca del 90% de los profesores asturianos de les asignatures de Música y Plástica participaron ayeri na fuelga contra la mengua d'hores lectives nestes asignatures, acordies con datos de la central sindical d'enseñanza STES, participando un grupu d'ellos nuna concentración de protesta énte l'edificiu de la Conseyería d'Educación.

La "Plataforma pa la defensa de les enseñances artístiques" esplicó que'l paru d'ayeri foi un pasu más dientro d'una campaña de movilizaciones contra una perda de representatividá d'estes enseñances que se traduz na desapaición de l'asignatura de música en primeru d'ESO y de Plástica en segundu cursu de la secuundaria obligatoria,acordies col borrador de bla Conseyería. Los representantes de la plataforma aseguren qu'Educación esplicó-yos que ye preciso reforzar les que llama "materies instrumentales" que son les de llingua, matemátiques, ciencies naturales y idiomes" un refuerzu que lleva a la mengua d'horarios pa la música y les artes. La fuelga, que se convocó en tol estáu, tuvo la rempuesta d'ente 3.000 y 4.000 maestros d'estes especialidaes.