Zapatero promete una rebaxa nel portalgu del Güerna

El presidente del Gobiernu José Luis Rodríguez Zapatero, participó ayeri n'Uviéu nel mítin central de campaña de los socialistes asturianos pa les autonómiques del próximu domingu, al qu'asistieron más de 6.000 persones. Nuna intervención centrada n'emponderar a la figura del Presidente asturianu Vicente Álvarez Areces y el so llabor al frente del Gobiernu, Zapatero comprometióse a dar, enantes de qu'acabe l'añu "un pasu alantre" pa rebaxar el coste del portalgu n'Autopista del Val.le Güerna, principal vía de comunicación ente Asturies y Lleón y na que'l PSOE se comprometiere nel so programa electoral a desaniciar dafechu'l portalgu. Zapatero esplicó que, dempués de la rebaxa del 30% a los tresportistes, nos próximos meses "van subvencionase progresivamente otru tipu de tresportes". Les infraestructures foron d'eta manera l'otru pegoyu de la intervención del Presidente del Gobiernu, que garantizó tamién que los Presupuestos Xenerales del Estáu de 2008 van inxertar la partida presupuestaria precisa pa facer la carretera ente La Espina y Ponferrada (Lleón).