Los maestros d'asturianu encerráronse pa esixir a Educación que negocie'l currículum de l'asignatura

Unos 40 maestros d'asturianu participaron esti fin de selmana nun encierru na escuela pública "Baudilio Arce" d'Uviéu. L'encierru entamó'l vienres de nueche dempués d'una asamblea celebrada nel mesmu centru y duró hasta les 12 de la mañana del sábadu. Con esta protesta, los maestros d'asturianu quixeron facer una nueva midida de presión pa forzar a la Conseyería d'Educación a entamar negociaciones sobre'l futuru de l'asignatura de llingua en primaria y secundaria. Dempués del encierru, los sindicatos SUATEA, CCOO y FETE-UXT van unviar esti llunes una carta conxunta, la tercera yá, al Conseyeru Riopedre, solicitándo-y una reunion pa tratar esti asuntu. La estabilidá de la plantiya d'asturianu, la eliminacion de los ratios mínimos d'alumnos pa impartir l'asignatura, la voluntariedá real de la mesma en tolos niveles educativos y la xuba del horariu lectivu, pasando de la hora y media actual a un mínimu de trés son les reivindicaciones que los sindicatos quieren que se reconozan en curriculum.