El músicu francés Fred Bougouin pon un cursu d'harpa céltica en Xixón

Los próximos díes 1 al 3 de xunu va celebrase en Muséu del Pueblu d'Asturies de Xixón
un cursín de fin de selmana sobre harpa céltica. La Fundación Municipal de Cultura y la Escuela de Música Tradicional La Quintana, de Xixón son los organizadores d'esti cursu pal que la mesma Escuela La Quintana va intentar facilitar instrumentos gratuitamente a aquelles persones interesaes.

El cursu va presentase'l vienres 1 a les 20 hores con un entamu nel salón d'actos del Centru de Cultura Antiguu Intitutu. Un conciertu a cargu del profesor del cursu Frédéric Bougouin-Kramer va facer d'entamu a unes actividaes que van treslladase'l sábadu 2 al Muséu del Pueblu d'Asturies, onde va facese la esbilla de niveles y puesta en práctica de conocimientos básicos sobre l'instrumentu, casu de la postura pa sentase, l'altura del instrumentu, la posición de les manes o de los deos. D'ehí en p'alantre, y hasta'l domingu 3, el cursu va dir avanzando acordies a les capacidaes y conocimientos del alumnáu, espidiéndose al acabar un diploma acreditativu d'asistencia.

El preciu de la matrícula ye de 32€ y la capacidá del cursu ta llimitada a 10 persones. P'apuntase y pa más información, el Muséu del Pueblu d'Asturies atiende a tolos interesaos n'horariu de martes a viernes, de 10 a 13 y de 17 a 20 h. nel teléfonu 985 18 29 60.



Tocante al maestru que va poner les clases, Fred Bougouin (Poitiers 1967) entamó los sos estudios d'harpa a los 6 años, averándose bien ceo al usu de l'harpa céltica, y al gustu pola composición, les igües y la música electroacústica. Dende entós, trabaya en delles formaciones y collabora con otros harpistes n'actividaes como los Rencontres Internationales de Harpe Celtique de Dinan, xuntu a Janet Harbison, Katrien Delavier o Myrdhin. D'otra manera, participa en diferentes grupos y estilos musicales, medievales, renacentistess, reggae, pop-rock, suramericanes, y sobre tou, céltiques, con más de 1000 conciertos n'Europa, dando-y una nueva visión al usu del instrumentu.