Representantes asturianistes aconceyaron cola candidata del PP por Xixón

La candidata a l'alcaldía de Xixón pol PP Pilar Fernández Pardo presentó esti sábadu nun alcuentru con representantes d'asociaciones y empreses asturianistes les sos propuestes sobre política llingüística. La reunión, a la qu'asistieron dellos de los más destacaos miembros de la llista popular por Xixón, amás del escritor n'asturianu Humberto González, representante del PP na Fundación Municipal de Cultura, celebróse nel Muséu del Pueblu d'Asturies. Nella, Pardo defendió la redacción y aprobación d'unes ordenances municipales pal usu de la llingua asturiana y la realización d'un Plan Municipal de Política Llingüística qu'espeye, ente otres midíes, l'usu del logotipu del Conceyu de manera billingüe en dependencies municipales y vehículos o la creación d'un corpus alministrativu onde los distintos documentos s'impriman de forma billingüe, amás del usu del asturianu na publicidá institucional del Conceyu, y el de los topónimos oficiales y normalizaos en señales, mapes y documentos. Los asistentes valoraron esti avance del PP xixonés pa col asturianu pero espusiéron-yos a los políticos, de manera cuasi unánime que la solución a la cuestión del asturianu tien que pasar pola declaración d'oficialidá de la nuesa llingua.