Un estudiu espeya que más de 21.000 persones foron víctimes de la Guerra Civil n’Asturies

La caderalga d'Historia Contemporánea de la Universidá d'Uviéu Carmen García presentó ayeri nuna rueda de prensa xunto cola conseyera de Vivienda y Bienestar Social, Laura González, y los directores de Servicios Sociales y Promoción Cultural, Pedro Rodríguez y Carlos Madera, la investigación sobre "Identificación de foses comunes y otros llugares d'enterramientu de persones desapaecíes como consecuencia de la guerra civil" un trabayu que va recoyese nuna base de datos que va poder consultase nel Archivu Históricu Provincial y na que s'espeyen más de 21.000 casos d'otres tantes persones que pudieron ser víctimes de la represión na Guerra Civil y la posguerra ente los años 1936 y los años 40.



La profesora d'Historia Contemporánea y coordinadora del trabayu agradeció la collaboración ciudadana a la hora d'ellaborar la base de datos y esplicó que l'estudiu sigue abiertu a aportaciones nueves de datos y testimonios, amás de sorrayar lo díficil d'un trabayu qu'esixó atender a munches fontes documentales de naturaleza estremada. Carmen Pérez esplicó que ye difícil "estremar con precisión los porcentaxes de víctimes represaliaes o muertes n'acción de guerra".

L'estudiu recueye unes 10.000 víctimes muertes n'acción de guerra, 2.100 víctimes de la represión republicana, xuntando la llegal y la incontrolada y 6.600 de la represión franquista, amestando a les víctimes de "paseos" y a les de xuicios y conseyos de guerra.
Los cementerios d'Uviéu y de Ciares - Xixón, con más de 1.200 enterraos en caúna de les sos sos foses comunes, concentraríen el mayor númberu de víctimes contra les setenta foses comunes del restu d'Asturies, les más d'elles nos conceyos d'Ayer y L.lena.