El PP decide güei l'orde de los candidatos na so llista al Congresu

"El comité electoral del PP asturianu decide esti martes l'orde definitivu de les llistes electorales pal 9 de marzu, una cuestión polémica nes últimes selmanes pol pulsu ente Gabino de Lorenzo, yá ratificáu como cabeza de llista, y la dirección del partíu, que proponía como númberu dos a Isidro Fernández Rozada. L'alcalde d'Uviéu Gabino de Lorenzo, ellaborare una llista pa les elecciones na que rescamplaben los cambios respeuto a la del 2004. Asina, nel cartelu electoral del Partíu Popular pa les elecciones d'esti añu al Congresu propuestu por De Lorenzo nun repitía nenguna de les persones que se presentaron nel 2004 nos cuatro primeros puestos pa esti cargu, y qu'hasta'l día 15 foron diputaos: Alicia Castro, Isidro Fernández Rozada, Avelino Sánchez y Leopoldo Bertrand. Namás l'ausencia d'Alicia Castro yera voluntaria, yá que decidió dexar la política pa centrar el so llabor na empresa privada.

Anque ayeri fontes cercanes a De Lorenzo confirmaren que la llista al Congresu diben formala, nesti orde, Gabino de Lorenzo, Pilar Fernández Pardo (Xixón), Jaime Reinares (Uviéu), Carmen Maniega (Avilés), José Coto (Mieres), Antonio Martínez (Llangréu), Fidel Sánchez (Llanes) y María Goretti Quintana (San Tiso d'Abres), a la fin, a ultima hora de la tarde, l'alcalde uvieín almitió qu'Isidro Fernández Rozada ocupare'l segundu llugar na llista al Congresu, siguiendo les órdenes de la dirección del partíu en Madrid, según adelantaron dellos medios. Con ello Pilar Fernández Pardo cae al tercer puestu y el cuartu, últimu que se considera con posibilidá de llograr puestu de diputáu, va ser pa Jaime Reinares.

El Presidente del Comité Electoral del PP asturianu, Jaime Reinares, declarárase de mano favoratible a la inclusión de Pilar Fernández Pardo nel númberu dos de la candidatura, énte los que defendíen que Fernández Rozada ocupare esti puestu. Reinares, nunes declaraciones mui dures, conseñare amás que nun diba aceptar nengún ""vetu a los que democráticamente dirixen el partíu en Xixón, sobre manera na persona de la so presidenta"". No referente a los populares que defenden la presencia de Fernández Rozada alegando que son mandaos d'Angel Acebes, Reinares sorrayó que ""ye indignante que se trate d'usar al secretariu xeneral del partíu, Ángel Acebes, pa xustificar una cacicada. Nun lo vamos permitir"". Sicasí, a última hora de la tarde d'ayeri la situación cambió enforma, y De Lorenzo almitía a Rozada pa evitar una crisis abierta nel partíu."