Cultura faise con dibuxos de Magín Berenguer

La Conseyería de Cultura llegó a un alcuerdu cola familia del estudiosu del arte asturianu Magín Berenguer (1918-2000) pa facese con más de cincuenta debuxos del artista nos que se reproducen los grabaos de les cueves del paleolíticu asturianu.

Berenguer, que llegó a ser conseyeru provincial de Belles Artes fexo ente los años cincuenta y primeros de los setenta un llevantamientu en dibuxos de les representaciones de les cueves asturianes: Candamu, Llonín, El Pozu'l Ramu, El Buxu, El Pindal o Les Pedroses pasaron pelos dibuxos de Berenguer, ente los que rescampla'l de la cueva de Llonín de 1,2 metros d'altu por 6 metros de llargu o'l de Candamu, de 2 x 8 metros. Parte de la colección de dibuxos de Berenguer pue vese nel uvieín Palaciu del Conde Toreno, sede del Real Institutu d'Estudios Asturianos (RIDEA).