La RTPA estrena’l so portal web de noticies n’asturianu 'estaya d'asturianu'

L'ente públicu de Radio Televisión del Principáu d'Asturies (RTPA) entama esti xueves 17 de mayu, día internacional d'Internet, la publicación en prebes de la so canal de noticies n'asturianu. Col títulu "estaya d'asturianu" el sitiu va inxertase nel menú de noticies del periódicu dixital de la TPA y va tener dominiu propiu en 'estayadasturianu.es'.

Con actualización diaria, la estaya d'asturianu de la TPA va tener noticies de sociedá, música, llibros, arte, cultura tradicional, cine, teatru y televisión, recoyendo informaciones referentes a la celebración d'actos culturales, novedaes y concursos, conciertos, o festivales, col oxetivu de dar cobertura a la mayor parte de l'actualidá que se produz nel ámbitu cultural asturianu.

La canal cuenta tamién con una sección complementaria que recueye les convocatories que faen les alministraciones públiques y instituciones del Principáu rellacionaes cola promoción y difusión del asturianu y una axenda d'actos culturales, amás de secciones de collaboración y participación abiertes a los internautes.