L’alministración reconoz el derechu d’un maestru a presentar documentos n’asturianu

Xosé Nel Comba Paz, el maestru al que la Conseyería d'Educación-y devolviere un escritu dando parte de les sos dietes por itinerancies profesionales por tar redactáu n'asturianu,vio ayeri como l'organismu del gobiernu asturianu-y daba la razón almitiendo los sos documentos al pagá-y les dietes que-y correspondíen, ello dempués de presentar un recursu d'alzada contra la decisión de la Conseyería.

Dende'l sindicatu d'enseñanza SUATEA, que llevó'l casu d'esti maestru del C.R.A. Cabu Peñes apúntase como l'almisión de los documentos n'asturianu por parte d'Educación da la razón "doblemente" a Xosé Nel Comba y a más xente que ta nesta desgraciada situación, citando'l casu del lletráu Xurde Blanco, que vive una situación asemeyada por comunicase a l'Alministración n'asturianu. La organización afirma que sí se puede exercer el derechu de dirixise en llingua asturiana y alégrase de que'l dañu se reparare, "esperando y deseando que más nunca pasen coses d'esti tipu".

SUATEA pide tamién "ente l'ausencia d'amparu llegal y énte los caprichos de l'Alministración" la oficialidá del asturianu como "la única ferramienta que garantice que nun sían conculcaos los derechos de les asturianes y de los asturianos que llibremente faigan usu del asturianu".