Tolos sindicatos, menos UXT, llamen a participar na manifestación escontra la criminalización'

"Los sindicatos asturianos de mayor representatividá, CC.OO, CSI, Suatea, CXT, CNT y USO, cola única ausencia d'UXT, convoquen pa esti martes 22 de xineru en Xixón una manifestación, que va salir a les 19.30 hores de la plaza l'Humedal, y va percorrer delles cais hasta llegar a la plaza Mayor, onde Teresa Muñón va dar llectura a un comunicáu.

Los representantes sindicales de les organizaciones convocantes conviden a la población a que participe na manifestación, que lleva como conseña oficial 'Escontra la criminalización de les lluches sindicales y sociales', al oxetu de denuciar los procesos penales abiertos, según denunciaron, a aquellos trabayadores que defenden los sos puestos de trabayu. Asina, les organizaciones convocantes van esixir l'anulación de tolos procesos penales a trabayadores y sindicalistes a los que se-yos aplicó'l Códigu Penal cuando defendíen los sos derechos como trabayadores. Tamién va pidise l'anulación de los artículos del citáu Códigu Penal que criminalicen l'actividá sindical y la movilización social, asina como'l puntu 3 del artículu 315, que se refier a los piquetes y la propaganda de fuelga, actividaes pa les que llega a pidir penes de tres años de presidiu.

L'actu de protesta tien tamién l'apoyu de la Plataforma escontra la Represión y poles Llibertaes, que pide amás la dimisión del delegáu de Gobiernu n'Asturies, Antonio Trevín, a quien echa la culpa de la ""represión"" que sufren trabayadores y representantes sindicales."