Felpeyu denuncia l’actitú del conceyal de cultura corverán Luis Solares pola organización del conciertu de San Xuan de 2006

El grupu musical Felpeyu emitió esta mañana una nota de prensa na que denuncia "el funcionamientu internu desastrosu del Ayuntamientu de Corvera, en particular na so estaya musical, y na del Conceyal de Cultura Luis Solares" al qu'acusen de "incompetencia y prepotencia pa col grupu" de ser "responsable d'una nueche folk con una organización penosa" y de "negase a pagar a fecha de güei'l caché del grupu".

El grupu esplica nuna llarga nota de prensa tolos pasos que llevaron a la nueche del 23 de xunu del 2006, na que los miembros de Felpeyu, que teníen de tocar al día dempués en Cataluña, tuvieron hasta altísimes hores de la madrugada esperando pa poder xubir al escenariu. El primer contactu colos responsables corveranos llegó a primeros del mes de mayu de 2006, cuando un técnicu del Ayuntamientu de Corvera contactó col grupu pa zarrar una actuación nel pantanu de Tresona con ocasión de la nueche de San Xuan de 2006. Con esi compromisu verbal, Felpeyu refugó otros conciertos que-yos ufiertaron pa esi mesmu día. Yá nel mes de xunu, el mesmu técnicu coménta-yos que'l conciertu nun se da por seguru y que tán a la espera de saber si ta incluyíu nos conciertos de la "Agenda musical", que paga l'alministración del Principáu d'Asturies al traviés de l'axencia Horus. Dempués de delles conversaciones, el técnicu del ayuntamientu confírma-yos l'actuación, que va pagar el mesmu
Ayuntamientu anque nun haya subvención, pero alviértese que Felpeyu "tien que tocar a les cuatro o cinco la mañana" y ello porque "el conceyal Luis Solares quier música hasta que seya de día". El grupu Felpeyu comenta qu'esti horariu, a lo cabero de la nueche, resúlta-y mui malu y afirma que la empresa uvieina Actos Producciones, xestionada por Marcos Valles, que contrata a tolos demás grupos que van tocar esa nueche "niégase a cambiar l'orde pa que Felpeyu pueda tocar primero" baxo l'argumentu de que les estrelles del cartel, el grupu "At First Light" "tien que tocar a les doce". El compromisu final al que se llega ye que Felpeyu va tocar a les cuatro de la madrugada.


Esa mesma nueche de San Xuan, y siempre según esplica'l grupu, a les 3:00 de la madrugada, durante l'actuación de DRD, un desconocíu robó la llave del xenerador de corriente, escapando corriendo. Énte la falta de personal de seguridá o de valles de protección, l'actuación de Felpeyu queda nel aire. Ello ye qu'hai que dir por otra llave al Berrón. Cuando esta llega a les 4y 5 de la madrugada, vese que nun funciona y coméntase qu'hai que dir por otra al polígonu de Villa-Riaño. Mientres, los músicos de Felpeyu echen tiempu tocando nel escenariu pa calentar los instrumentos. A les 4 y cuartu, vese que yá nun queda públicu y que tan retirándose les cuñes de monitoraxe. El grupu decide retirase y marchar pa Cataluña, un viaxe de 11 hores.

Nesi momentu, el técnicu del conceyu esplica que si'l grupu nun toca, anque sea n'acústicu el conceyal Solares nun va a querer pagar, a pesar del compromisu verbal. Los miembros del grupu entienden que la propuesta de ponese a tocar nun prau enorme y desiertu a les cuatro y media la mañana ye absurda y piensen que cumplieron col l tratu, garrando la furgoneta a les 04:55. A primer hora de la mañana, la furgoneta de Felpeyu sal de la carretera, un accidente que causa la muerte de Carlos Redondo Bajo y d'Ígor Medio Tuya.

Ensin más noticia del ayuntamientu de Corvera dempués del accidente, el siguiente contactu produzse a mediaos d'agostu, cuando'l conceyal Solares esplica al músicu de Felpeyu Diego Pangua "que yo decido equí quién cobra y quién non" espetándo-y un "si nun tocastis, cómo vamos pagavos". El conceyal comprometióse de cualquier manera a pidir un informe al técnicu y llamar a Diego Pangua nos siguientes díes. Más d'un mes dempués sigue ensin haber informe nin más noticies, polo que los músicos deciden falar con Tito, el técnicu del conceyu. Según esplica Diego Pangua, esti confesó-y "que sí entregó un informe al conceyal aclarando que Felpeyu cumplió'l contratu verbal existente" y como Luis Solares suxirió cambiar los datos del informe pa nun tener que pagar. Nel últimu contactu telefónicu con elli, Solares diz qu'elli ye una persona "respetada tanto na derecha como na izquierda por ser inflexible, y vosotros nun vais cobrar".

Los miembros de Felpeyu llamenten lo "triste" d'esta actitú en comparanza cola del Festival de músiques d'Arrel de Calaf (Barcelona), onde Felpeyu tenía que tocar al día siguiente de la horrible nueche del 23 de xunu. Nesti casu, y al contrario que en Corvera, anque'l conciertu nun pudo celebrase, la organización del mesmu abonó igualmente'l caché del grupu, amás d'interesase vívamente pol estáu de los felpeyos y les sos families.


Felpeyu afirma que quier facer pública esta historia "como denuncia d'un comportamientu llonxe del que se tien que tener con persones que tán trabayando, amás dexar polos suelos la imaxe del conceyu de Corvera que nun merez dirixentes d'esti tipu". El grupu quier "que se sepa quien ye Luis Solares, candidatu a l'alcaldía pol PP nes elecciones d'esti mes de mayu de 2007, del que la carrera política esperamos que quede a l'altura de la so talla personal".