Entama la campaña electoral

Los partíos políticos asturianos entamaron ayeri la campaña electoral coles tradicionales pegaes de cartelos y ruedes de prensa. Ente los que más priesa tuvieron pa ello tuvo la coalición PAS-URAS, que convocó a la prensa na tarde d'ayeri en Xixón, hores primero del entamu de la campaña oficial, p'adelantar les sos impresiones sobre la campaña qu'entama.

L'ex-presidente asturianu y cabeza de llista Sergio Marqués sorrayó'l fechu de que nun s'espublizaren encuestes previes a les elecciones, dalgo que rellacionó cola existencia d'intereses que nun queríen que se dieren a conocer. Marqués aseguró que dempués del 27 de mayu PAS-URAS va sentase a negociar con quien quiera aconceyar con ellos pero, como sorrayó Xuan Xosé Sánchez Vicente "nun vamos ser palafreneros de naide".

Pela so parte, el andidatu de la coalición Izquierda Xunida, Bloque por Asturies - Los Verdes (IU-BA-LV) a la presidencia, Jesús Iglesias, celebró actos de pieslle de precampaña n'Uviéu y Xixón, punxo la fecha del 27 de mayu como'l día en que va decidise "cuánta más izquierda va a haber nel Gobiernu d'Asturies". Col compromisu d'una Asturies "más social, más sostenible ecolóxicamente y con mayor autogobiernu", Iglesias compareció xunto colos representantes del Bloque por Asturies, Rafael Palacios y de Los Verdes, Enrique Trujillo y José Nebot; amás del conseyeru de Xusticia y númberu dos de les llistes Francisco Javier Valledor y les diputaes Noemí Martín y Paloma Uría. Dende'l Bloque por Asturies, Rafael Palacios centró la so intervención na defensa de la oficialidá del asturianu nel estatutu d'autonomía y nel reconocimientu del derechu de los ciudadanos a falar nesta llingua". Palacios, que negó la imaxe d'imposición cola que se quier rellacionar la oficialidá dende otros ámbitos políticos, afirmó que "quien quiera gobernar va a tener que facelo n'asturianu".

El candidatu del PP a les elecciones, Ovidio Sánchez, tamién abrió la campaña electoral oficiosamente nun actu celebráu ayeri de tarde n'Uviéu y nel que marcó'l so oxetivu de gobiernu en llograr "qu'Asturies se convierta na rexón más rica d'España" presentando como ún de los pegoyos de la so promesa electoral un plan pa llograr que la emigración moza asturiana pueda volver a trabayar n'Asturies.

Los socialistes asturianos entamaron la campaña con un actu que se celebró ayeri de nueche nun hotel de la capital asturiana y al qu'asistieron el cabeza de llista y actual presidente Vicente Álvarez Areces y el secretariu xeneral de la FSA Javier Fernández, anque'l primer actu fuerte de la campaña de la FSA va tener llugar güei vienres 11 nel pabellón de deportes de La Guía de Xixón cola presencia de la vicepresidenta del Gobiernu María Teresa Fernández de la Vega.