Asturies, Galicia y Portugal van pidir la declaración de Patrimoniu Européu pa los sos castros

Asturies, Galicia y Portugal llograron ayeri un alcuerdu pa solicitar la declaración de los castros del noroeste de la península Ibérica como Patrimoniu Cultural Européu nuna reunión que se cewlebró nel castru del Chao Samartín, en Grandas de Salime.

El director xeneral de Promoción Cultural y Política Llingüística asturianu Carlos Madera, el gallegu Felipe Arias, el caderalgu de la Universidá d'Oporto, Armando Coelho y l'arqueólogu asturianu Angel Villa foron los participantes na primer sesión de trabayu pa esta candidatura conxunta que se marca como primeros oxetivos llograr la catalogación de los castros y del territoriu que tomen xunto conm una riestra d'inversiones y pal caltenimientu, divulgación y rentabilidá económica de los castros d'esti área xeográfica, que son más de 6.000, los más d'ellos dataos nel primer mileniu AC, d'ellos más de 300 asturianos.

La categoría de Patrimoniu Européu plantea dellos criterios de selección, ente ellos el valor emblemáticu pa la identidá d'Europa, la existencia d'un sistema de xestión, protección y conservación y l'inxerimientu de polítiques de puesta en valor y promoción de los elementos culturales a protexer.