Más de 600 estudiantes de secundaria de Xixón participaron nos alcuentros cola llingua

La Oficina Municipal de la Llingua celebró esta selmana los Cuartos Alcuentros de la Mocedá cola Llingua, una actividá pa los estudiantes d'Enseñanza Secundaria y Bachilleratu de Xixón que tuvo por escenariu'l Xardín Botánicu Atlánticu.

La Conceyala d'Educación y promoción del asturianu Carmen Rúa Morán asistió a esta xornada que contó col trabayu de más de venti monitores especializaos p'atender a cerca de seiscientos alumnos y alumnes de doce Institutos de la ciudá. Un percorríu pel xardín p'aprender los nomes de les plantes y la vexetación de cada fastera o unes partíes a xuegos tradicionales asturianos yeren delles de les actividaes programaes, rematando con un conciertu del grupu La Bandina.

Celebtróse asina la cuarta edición del proyectu "saca la llingua" col que la oficina de la llingua de Xixón pretende que la mocedá s'avere a la llingua asturiana dende un aspectu que nun seya puramente académicu y qu'entame a entendelu como una ferramienta normal de comunicación al tiempu que va poder disfrutar de les distintes propuestes que guarden rellación con ella, como la música, el teatru o'l videu. Dende los 284 estudiantes que participaron a los cerca de 600 d'esta, l'exitu de la convocatoria ye una constante.