Areces siéntes orgullosu de lo que fexo'l PSOE pol asturianu

El presidente asturianu Vicente Álvarez Areces, participó ayeri na polémica entamada ente'l candidatu d'IX-BA-LV Jesús Iglesias y dellos representantes de la FSA-PSOE sobre la oficialidá del asturianu. Dende un actu en Madrid, Álvarez Areces declaró que la diferiencia ente la propuesta de la FSA y la d'IX alcuéntrase na "obligatoriedá" del asturianu. Areces defendió'l llabor de los gobiernos que presidió dende 1999 "pa la protección, usu y superviviencia del bable a lo llargo de los años" y declaró sentíse arguyosu del llabor del PSOE en defensa del asturianu.

Les declaraciones d'Areces vienen dempués de que dos de los mayores cargos de la FSA, el so Secretariu xeneral Javier Fernández, y del Gobiernu, la so portavoz y conseyera de cultura Ana Rosa Migoya, se declararen otra vez más contrarios a la oficialidá del asturianu, ello al rau de la propuesta del candidatu Jesús Iglesias pa llograr un "modelu asturianu d'oficialidá" que s'encontare precisamente na "non obligatoriedá" pa los ciudadanos.