La UXT píde-y a IX que llegue a un alcuerdu presupuestariu col PSOE

"El secretariu Xeneral d'UXT Asturies, Justo Rodríguez Braga, dio ayeri por ""acabáu'l capítulu"" no tocante a un posible pautu de Gobiernu ente PSOE y IX, pero insistió en que lo que-y ""esmolez"" y lo que-y pide la organización ye ""un alcuerdu colos presupuestos, fórmese o non parte del Gobiernu"", que permita sacar alantre l'Aceba (Alcuerdu pa la Competitividá, l'Emplegu y el Bienestar d'Asturies, que sustitúi al ya acabáu Alcuerdu pal Desarrollu Económicu y la Competitividá Económica)"".

""Espero que l'Aceba tenga un apoyu mayoritariu tamién de los grupos de la oposición porque sinón diba vese rebaxáu'l 25 por cientu de les inversiones previstes"", dixo Braga, qu'aseguró que ""de nun ser asina, los asturianos van pasar factura, y más a los que tán asitiaos más a la izquierda, a quien nun apoye los alcuerdos aprobaos polos axentes sociales"". Justo Rodríguez Braga fizo balance del pasáu añu 2007 xunto al Secretariu de Formación d'UXT, Manolo Cancio, y adelantó los principales oxetivos del sindicatu pal recién estrenáu 2008. Na so intervención, Justo Rodríguez Braga volvió a llamentar que les fuercies de la izquierda nun fueren quién a llegar a un alcuerdu, sobre tou cuando los resultaos electorales foron ""asemeyaos a los d'hai cuatro años"" y aseguró qu'esta falta d'alcuerdu ye ""negativa"" p'Asturies. Dixo que pa UXT los presupuestos del Gobiernu son ""espansivos y sociales"" y al so xuiciu ""deberíen negociase y aprobase"". De nun ser asina, ""n'Asturies pue avanzase hacia'l votu útil de la izquierda"", dixo Justo Rodríguez Braga, qu'insistió en que ye necesario ""que s'imponga'l sentíu común"", pa sacar p'alantre l'Aceba.

De la mesma manera, UXT plantégase l'oxetivu de ""facer insistencia y influyir"" na reforma del estatutu d'Autonomía, presentando les sos propies propuestes al Parlamentu asturianu. Rodríguez Braga indicó que, en pasando'l 9 de marzu van entregar les sos propuestes a la presidenta de la Xunta, María Jesús Álvarez. El sindicatu quier tamién aludir a les propuestes electorales de los diferentes partíos pa que los sos programes recueyan les principales preocupaciones de los trabayadores asturianos.

En llinies xenerales el sindicatu consideró que'l 2007 foi ""un añu con lluces y solombres y esperanzador, ello coles sos carencies"". No económico Braga insisitió nel ""crecimientu importante "" y felicitóse pol dinamismu de la industria. Sicasí, destacó que se xeneró munchu emplegu, pero en gran midida precariu y temporal, llamentando la ""falta de voluntá"" del empresariáu pa crear emplegu estable y resaltó que la temporalidá lleva arreyada mayor siniestralidá y menor productividá. Precisamente la siniestralidá foi ún de los principales ""puntos negros"" del 2007 pal sindicatu."