La Xunta Pola Defensa de la Llingua Asturiana llama a manifestase pola oficialidá del asturianu nel Día de les Lletres

El próximu vienres 4 de mayu la Xunta pola Defensa de la Llingua Asturiana convoca, como ye vezu, la tradicional manifestación que coicide cola celebración del Día de les Lletres Asturianes. Col lema "L'Asturianu Llingua Oficial" la marcha va salir a les 19:00 de la Estación del Norte d'Uviéu.

La organización de defensa del asturianu sorraya la importancia d'esta convocatoria en cuantes que "nel mes de mayu n'Asturies vamos vivir un procesu electoral. Nél van escoyese los nuesos representantes na Xunta Xeneral y d'ehí va salir el gobiernu asturianu futuru. La llexislatura que vien va ser la de la reforma del Estatutu d'Autonomía asturianu y tien que ser tamién la de la reconocencia estatutaria de la oficialidá".

La Xunta asegura que "Anque haya partíos que nun lo incluyan nos sos programes electorales eso nun va esconder la realidá d'una demanda pola que llevamos lluchando demasiaos años: la reconocencia de la igualdá xurídica de tolos asturianos y asturianes falen la llingua que falen". El balagar de casos que se viven estos díes y que recuerden "que nun pue haber garantíes xurídiques si la llingua nun ye oficial" ente ellos el de los funcionarios a los que l'alministración nun almitió papeles n'asturianu o'l del doctorandu que nun pudo tramitar la so tésis n'asturianu na Universidá d'Uviéu lleven a la Xunta a afirmar que "la única imposición ye la que tán sufriendo los que quieren usar con normalidá, en tolos ámbitos de la vida" polo que convida a los ciudadanos a participar na marcha a y a los partíos políticos a reconocer la oficialidá