Música de tolos palos pola oficialidá del asturianu

El XIX Conciertu pola Oficialidá volvió a rexistrar un altu poder de convocatoria, llevando a la carpa que punxo la Xunta pola Defensa de la llingua nel aparcamientu del Carlos Tartiere d'Uviéu a dellos miles de persones qu'esfrutaron de los sones de grupos asturianos de tolos estilos, dende'l hip hop de K-Nalón hasta'l folk de Llangres, pasando pela presencia de les pandereteres de Dulcamara, que veníen de dar conciertos per Escocia. La nueche valió tamién pa ver el bon llabor sobre un escenariu d'estes característiques d'un artista como Toli Morilla, más avezáu a entornos más recoyíos, o pa que los miembros de Skama la Rede dieren a conocer los sos nuevos temes, a incluyir nel discu que tán p'asoleyar "Ecahaos a la mar". Tuenda, la banda de Xosé "Ambás", el duu Lafu y Rebeca Velasco y la sesión de reggae y mezcles a cargu de Chalaneru Soundsystem remataron una nueche na que, como ye vezu, los artistes collaboraron desinteresadamente cola causa de la oficialidá del asturianu. Y van yá 19 años que lo vienen faciendo.