Entama la Selmana de les Lletres Asturianes

La conseyera de Cultura Ana Rosa Migoya, y el director de la oficina de Política Lingüística, Ramón D'Andrés, presentaron ayeri oficialmente los actos de la Selmana de les Lletres Asturianes, que va esparder los más de 60 actos del so programa per venti conceyos asturianos.

La narrativa asturiana va ser la protagonista d'una selmana que va centrase lo mesmo na novela que nel cuentu.

Pa presentala, xunto coles autoridaes, tuvieron los autores Ismael González Arias y Xosé Lluis Campal, responsables de los dos llibros conmemorativos d'esta Selmana, "La narrativa asturiana nel cantu'l mileniu" y "La emancipación de la lliteratura asturiana" respectivamente. Nel actu, Xosé Lluis Campal declaró públicamente la necesidá del reconocimientu del asturianu como llingua oficial pa garantizar la so supervivencia.



Dientro de les novedaes que presenta la Selmana de les Lletres del 2007 la conseyera Ana Rosa Migoya, que fexo la presentación n'asturianu, rescampló la participación d'escritores de toa España, el que por primer vegada toles biblioteques d'Asturies s'amiesten a la celebración, y la collaboración de la ONCE, cola que va asoleyase una edición en Braille del llibru coordinau por Ismael Arias, na primer entrada bibliográfica del asturianu pa invidentes.