El Sporting acaba la primer vuelta en puestu d'ascensu

El Sporting de Xixón llogró en campu del Eibar un trunfu difícil que-yos permite a los asturianos siguir en puestu d’ascensu a primera división. L’equipu de Manolo Preciado, que salió con camisetes d’apoyu a la so afición en protesta pol altu preciu de les entraes al campu impuestu pol club vascu a costafecha pola visita de la “mareona” sportinguista, adelantóse gracies a Diego Castro nel minutu 2 nuna xugada ensayada previamente nos entrenos na que s’aprovecharon les posibilidaes d’allegar rápidamente’l balón a la portería gracies a lo estrencho del campu d’Ipurúa. El gol del delanteru sportinguista siguió solu en marcador tola primer parte y viose bien ceo que diba ser poca ventaya. Sporting perdonó delles ocasiones y nun supo aprovechar la ventaya de númberu que-y dio la espulsión de Txiki, y asina, na segunda parte, un Eibar con 10 entamó a apertar sobre la portería de Roberto, dacuando entrando hasta l’área, onde los futbolistes del Sporting, sabiendo lo curtio de la ventaya, xugaben con mieu a cometer penalti. Les protestes del entrenador eibarrés por una entrada de Gerard valiéron-y la espulsión tamién al técnicu local, que facía un apueste claru por entornar el resultáu dándo-yos entrada a dos delanteros. L’Eibar raspiaba l’empate cuando Barral marcaba’l segundu y, darréu, Bilic pesllaba’l marcador col definitivu 0-3 que demostraba la superioridá d’un Sporting que xugó la carta de la precisión y la efectividá nes acciones aisllaes.