Mark Ostrowski presenta en Xixón los sos retratos de tratantes de ganáu

Dende esti vienres 20 d'abril ta abierta al públicu na Casa de los Valdés del Muséu del Pueblu d'Asturies la esposición de semeyes de Mark Ostrowski, "Tratantes. Una especie n'estinción" que s'acompaña del llibru del mesmu títulu, nel que l'autor americanu asitiáu n'Asturies andechó col escritor asturianu Xuan Bello pa facer los testos.


La esposición presenta un total de treinta y cinco semeyes sobre tratantes de ganáu asturianos feches nos últimos años por Mark Ostrowski (1972), fotógrafu, escritor, traductor y rellacionáu en cierta midida col oficiu pola so condición de criador d'oveyes. Les imáxenes acompáñense nel llibru de dos testos, ún del mesmu Ostrowsky y otru del escritor Xuan Bello, qu'arriquez les semeyes con histories y testimonios de los mesmos tratantes.


Al actu de presentación de la obra, que va facese a les 12 del mediudía, van asistir les conceyales d'Educación y Cultura Carmen Rúa Morán y Pilar González Lafita, el director del Muséu Joaquín López Álvarez y los mesmos autores Xuan Bello y Marc Ostrowski. La esposición va tar abierta nel Muséu del Pueblu d'Asturies hasta'l mes de xunu pa treslladase darréu a la Rede de Museos Etnográficos d'Asturies, casu del ecomuséu de Somiedu o l'Etnográficu del Oriente d'Asturies. Caxastur y la Fundación Municipal de Cultura de Siero collaboraron cola edición del llibru.