El Farho Xixón Baloncestu allóñase del primer puestu dempués de perder en Plasencia

"L'alcuentru tuvo condicionáu poles baxes del equipu xixonés, que llegó a pidir l'aplazamientu, ensin concedé-ylo la Federación Española, pola mor de tar yá seleccionaos los equipos que se clasificaben pa la Copa LEB Plata.
Los problemes de los xugadores americanos, dambos con mancadures, obligó a la direutiva xixonesa a fichar al pivot José María Balmón, llibre dempués de xugar esta temporada nel Palma Aqua Mágica de la LEB Oro. En Plasencia'l Farho Xixón Baloncestu presentábase coles baxes de Kiefer -internáu nun hospital- y Sony Vázquez, y con un Brandon Wolfram mermáu polos sos problemes nuna rodiya -xugó poco más de diez minutos-, Peter Rajniak malu del gripe -viaxó a Plasencia'l día'l partíu- y Chus Pineda, que tuvo tamién problemes físicos a lo llargo la selmana.
Salieron mui bien los asturianos nel entamu'l partíu y llograron ponese delantre con un 2 a 11, tres un parcial de 0 a 9, con un Chus Pineda sobresaliente. Ehí l'equipu local reaccionó, a lo meyor pola presión del públicu, primero con un empate a trece y dempués ganando'l periodu por un 16 a 15. Nel segundu cuartu José María Balmón y Adrián Gracía tuvieron perbien, metiendo caún d'ellos diez puntos, y manteniendo a los xixoneses nel alcuentru, llegándose al descansu con un 38 a 35.
Nel tercer cuartu Chus Pineda foi'l pegoyu l'equipu, metiendo catorce puntos siguíos, pesllando un triple de Balmón un empate a 61. El caberu cuartu entamó igualáu, hasta que l'equipu cacereñu llogró una ventaya de seis puntos, 71 a 65, anque nun yera a separtase nel marcador, yá que los asturianos llegaron a ponese a trés puntos, 74 a 71, ehí foi cuando apaeció Enrique Suárez y los locales algamaron una ventaya d'once puntos, 84 a 73. Darréu la reacción de los xixoneses nun-yos valió pa ganar el partíu y la ventaya estremeña foi de cinco puntos con esi 89 a 84 final.
Destacar el gran partíu d'Adrián Gracía (con dobles figures -14 puntos y 12 rebotes- y 4 asistencies), Joasé María Balmón (26 puntos y 6 rebotes, anque perdió tamién 6 balones) y Chus Pineda (20 puntos, 2 rebotes y 1 asistencia). Nos locales los más destacaos foron Jason Blair (20 puntos, 7 rebotes y 2 asistencies), Enrique Suárez (16 puntos, 1 rebote, 3 asistencies y ficiéron-y 6 personales) y Mark Zoller (11 puntos, 8 rebotes y 3 asistencies). Ún de los aspeutos más negativos y determinantes nos asturianos foron los 21 balones perdíos.
Ficha téunica:

Extremadura Plasencia-Galco: Mark Zoller (11), Rubén Ibeas (17), Mario Fernandes (11), Dominick Martin (12) y Jason Blair (20). Tamién xugaron: Julián Garrote, Enrique Suárez (16), Ignacio Fort y Miguel Ángel Conejero (2).

Farho Xixón Baloncestu: Rubén Suárez (4), Logi Gunnarsson (12), Peter Rajniak, Adrián García (14) y Lucian Kieser (2). Tamién xugaron: Chus Pineda (20), José María Balmón (26), Sergio Alonso y Brando Wolfram (6).

Árbitrios: Ángel Antonio Albacete y José Vázquez. Nel Farho Xixón Baloncestu foi elimináu por cinco personales Adrián García y nel Plasencia Rubén Ibeas. Partíu de la decimosétima xornada de la Lliga Addeco LEB Plata, xugáu nel Pabellón Ciudad de Plasencia, con unos mil quinientos espeutadores. Parciales por cuartos: 16-15, 22-20, 23-26 y 28-23."