L'Entregu CF recibe esti sábadu'l premiu Andrés Solar

"La Xunta Pola Defensa de la Llingua fai esti sábadu 19 la ceremonia d'entrega de los XXIII Premios Andrés Solar, colos que tolos años reconoz a les persones y entidaes que más fexeron a favor y en contra de la llingua asturiana La ceremonia va entamar a les siete y media de la tarde, nel salón d'actos del Antiguu Institutu Xovellanos de Xixón y nella va facese entrega del Pegollu, Premiu Andrés Solar 2007, a l'equipu de fútbol L'Entregu CF en reconocimientu a la so aportación a la visualización y normalización de la llingua asturiana nel ámbitu del deporte. El xuráu de los premios valoró mui positivamente la voluntá firme del equipu na defensa del nome verdaderu del so llugar, L'Entregu, y la so difusión en tou tipu de medios deportivos y xeneralistes.

D'otra banda, faráse entrega de la Madreña Purpurina al secretariu xeneral de la FSA-PSOE Javier Fernández Fernández pola so trayectoria d'ataques y esibiciones de prexuicios contra la llingua asturiana y contra los derechos llingüísticos de los asturianos y asturianes.

L'actu incluirá tamién la tradicional llectura del discursu añal de la Xunta pola Defensa de la Llingua Asturiana nel que se fará repasu de lo que'l 2007 dio se sí no tocante a la realidá de la llingua asturiana, y va rematar cola participación de Toli Morilla. El cantautor, siempre solidariu y dispuestu a sofitar les actividaes de la Xunta, va ufiertar una selección de los sos cantares más nomaos."