Andecha Astur afirma que Trevín tien de dimitir por “demostrase qu’apadrinó a especuladores"

El secretariu d'organización de la formación política Andecha Astur, Germán Abad, pidió ayeri la dimisión del delegáu del Gobiernu y antiguu alcalde de Llanes, Antonio Trevín, al que considera "inhabilitáu pa ocupar cualquier cargu públicu" dempués de conocese la sentencia del TSXA qu'anula'l Plan Xeneral Urbanísticu del conceyu de Llanes, redactáu y aprobáu na etapa de Trevín como alcalde llaniscu.

El secretariu xeneral d'Andecha Astur, el tamién llaniscu Germán Abad Abad, dio ayeri una rueda de prensa xunto cola abogada María Carmen Alvarez Carril, lletrada que punxo'l recursu contenciosu alministrativu en nome de la formación política nacionalista na que se reclamaba la illegalidá del Plan Xeneral Urbanísticu del conceyu de Llanes ateniéndose a la omisión del trámite d'información pública del mesmu.

Abad esplicó que la decisión del Tribunal demuestra que Trevín fomentó nos últimos años un turismu "desenfrenáu y "agresivu" venceyáu a la "nómina d'especuladores qu'apadrinó" acusando a Trevín de somorguiar a Llanes nuna "inseguridá xurídica de grandes dimensiones".

Abad, que se congració del fallu xudicial contra'l PXOU
Llaniscu, destacó qu'un de los argumentos fundamentales de la sentencia anulatoria del PGOU llaniscu foi la inexistencia del trámite obligatoriu d'información pública del PGOU dempués d'anulase anteriormente pol Tribunal Supremu normes subsidiaries de Llanes tocantes a los planes parciales de La Talá, Los Altares, y La Llavandera. Abad acusó a Trevín de "caciplar constantemente de forma grosera el términu "desarrollu sostenible" col oxetivu de favorecer intereses determinaos" permitiendo que la especulación asitiare en Llanes a costa de los ciudadanos".

Germán Abad, representante d'Andecha Astur, formación política inxerta agora na coalición "Unidá" y candidatu pola mesma a diputáu pela circunscripción oriental, declaró que "la única solución a partir de ahora pasa, según Abad, porque los responsables políticos "escuchen" a les fuerces polítiques y colectivos sociales pa buscar salides y "facer les coses bien".

L'abogada d'Andecha Astur nel procesu, María Carmen Alvarez Carril esplicó que si agora'l Conceyu de Llanes o'l Gobiernu Asturianu decidieren recurrir la sentencia al Supremu, la decisión definitiva podría tardar en llegar ente tres y cuatro años.