"Unidá" presentóse col enfotu de ser "la rempuesta a una demanda histórica del nacionalismu asturianu"

Los partíos políticos Andecha Astur (AA), Izquierda Asturiana (IAS) y los Verdes-Grupu Verde presentaron ayeri oficialmente la coalición electoral "Unidá" una opción nacionalista que va llevar por candidatu al conocíu escritor y historicu militante asturianista Ignaciu Llope. El mesmu Llope definió "Unidá" como un apueste énte l'escosamientu del modelu políticu y económicu del gobiernu asturianu, que ta "desfasáu y ensin idegues".

La xuntura ente los tres partíos nacionalistes, ecoloxistes y d'izquierda márcase los oxetivos de defender la identidá asturiana y de proponer un modelu social, económicu, y ecolóxicu basáu na xusticia social. Llope, que descartó cualquier posible alianza colos partíos del actual gobiernu en casu de llograse representación na Xunta Xeneral, calificando a PSOE y IX-BA como "amistaes peligroses" definió Unidá como una candidatura marcada por dos necesidaes, la "interna del nacionalismu asturianu" y "la esterna de la mesma sociedá asturiana, que demandaba un proyectu d'estes característiques".

Pela so parte, Germán Abad, representante d'Andecha Astur, defendió la figura de Llope como'l meyor candidatu posible y calificó a "Unidá" como "la rempuesta a una demanda histórica del nacionalismu asturianu", una idea na qu'afondó'l candidatu electoral, que s'enfotó en que "Unidá" seya'l "principiu d'un cambiu nel nacionalismu asturianu" y una formación que "recueya toles sos demandes históriques".

El númberu ún de la coalición declaró que se presentaba como candidatu porque-y lo pidiera "una gran mayoría nacionalista asturiana" y pola necesidá de "afitar un impulsu nacionalista que se foi creando a lo llargo de los últimos 30 años". Llope, qu'aseguró que los oxetivos de "Unidá" pasen por entrar nes instituciones, declaró que "queremos entrar nel parlamentu asturianu para dá-yos voz a munches persones que nun tán contentes col modelu actual y que-yos abulta imprescindible un cambéu nacionalista".

El secretariu xeneral d'IAS, Faustino Zapico, que fexo de presentador del actu, esplicóque'l nuevu proyectu supón una "alternativa real" al "supuestu asturianismu" y al "pseudoecoloxismu d'IX" qu'afirmó que, cuando-y toca gobernar, demuestra que nun ye más qu'una muleta del PSOE". Zapico comentó que la formación Los Verdes - Grupu Verde, tercera sigla de la coalición, "inxerta a militantes de Los Verdes d'Asturies disgustaos col pautu ente esa formación y IX"

Na rueda de prensa de presentación tuvieron presentes tamién Violeta Santapaz y Santiago Artime, actualmente conceyales d'Andecha Astur por Riosa y Candás y que van ocupar los númberos dos y trés de la llista de "Unidá" pola circunscripción central tres d'Inaciu Llope, mientres que'l candidatu pela circunscripción oriental va ser Germán Abad y el de la occidental Roberto Menéndez. Nel actu d'ayeri adelantóse que "Unidá" va presentar llistes en cerca de venti conceyos asturianos.

Web de Unidá (en construcción)