La Conseyería de Cultura tien abiertos los plazos pa presentase a los sos concursos lliterarios

El premiu de novela en llingua asturiana "Xosefa Xovellanos" el d'ensayu "Máximo Fuertes Acevedo"el de poesía "Xuan María Acebal" y el de periodismu "Enriqueta González Rubín" son les cuatro convocatories que tien abiertes esti añu la Conseyería de Cultura, al traviés de la Oficina de Política Llingüística pa la creación en llingua asturiana. Dotaos toos ellos con un primer premiu de 7.000 euros, sacantes el de periodismu, que cuenta con un premiu de 3.000 euros, los certámenes, que se planteen "col envís de premiar la escelencia lliteraria de los nuestros creadores" tán abiertos a trabayos asoleyaos nesti añu, nun siendo nel casu del de periodismu que, pol so calter biañal, almite trabayos espublizaos ente'l pieslle de la última convocatoria (1 de payares del 2005) hasta'l mesmu ochobre del 2007. El plazu pa presentase a cualquiera de los cuatro concursos ta abiertu hasta'l 1 d'ochobre del 2007, y toles bases y requisitos de les obres y trabayos qu'aspiren a los premios puen consultase na web de la Oficina de Política Llingüística, qu'entamó a funcionar esti mesmu mes.