Entama la campaña electoral en Francia

La campaña electoral pa les próximes presidenciales franceses entamó oficialmente ayeri. Los dos principales candidatos son la socialista Segolene Royal, que dfende la meyora de los servicios públicos y del salariu mínimu, y el el conservador Nicolas Sarkozy de la UMP, que centra'l so mensaxe nel pieslle a la inmigración y la flexibilización del mercáu llaboral. Xunto con ellos, rescamplen les figures d'otros dos aspirantes, l'ultraderechista Jean Marie Le Pen y el candidatu de l'antigua formación derechista UDF, François Bayrou.

Mientres Bayrou, cola defensa de los intereses del campesináu francés, xube nes encuestes, que-y dan una intención de votu de cerca del 20%, el veteranu Le Pen prendió la campaña ufiertándo-y a Sarkozy, que tien d'exe de la so campaña'l frenu a la inmigración, una posible alianza pa la segunda vuelta.

Una de les característiques que más llamen l'atención de la campaña francesa ye la igualdá ente tolos doce candidatos qu'aspiren a presidir la nación a la hora de facer propaganda. Ello ye que, por llei, los 12 aspirantes al Elíseu tienen derechu al mesmu tiempu d'intervención en radios y televisiones y les sos cuñes publicitaries han pasase toles veces que faiga falta hasta que tomen 45 minutos d'emisión.